Në kuadër të Ditës Ndërkombëtare të Detarisë, Porti i Durrësit u kthye sot në një qendër aktivitetesh dhe bashkëbisedimesh nën moton “SEA the future, waves of tomorrow”. Aktiviteti synoi të theksojë rolin e sektorit detar si një motor zhvillimi ekonomik, por edhe si hapësirë për inovacion, punësim dhe bashkëpunim ndërkombëtar.
Serena Kovaçi, Drejtore e Qendrës së Ekselencës për Çështje Detare tha:
“Ky aktivitet bashkon profesionistë, institucione, akademikë dhe të rinj për të ndarë ide, për të diskutuar sfidat dhe mundësitë e së ardhmes… synojmë që ky aktivitet të sjellë në vëmendje rëndësinë që detaria ka si motor i zhvillimit ekonomik, teknologjik dhe social. Deti, që ka qenë gjithmonë pjesë e historisë sonë, sot është më shumë se kurrë pjesë e së ardhmes.”
Një nga temat kryesore ishte vizioni i ri për zhvillimin e kompleksit portual të Durrësit, i cili ka hyrë në një fazë transformimi me investime të rëndësishme, përfshirë ndërtimin e Portit të ri Tregtar në Porto Romano dhe të Marinës Turistike.
Kreshnik Bajraktari, Drejtor ekzekutiv i Autoritetit Portual Durrës u shpreh:
“Ky vizion merr jetë përmes dy projekteve madhore, Porti i ri tregtar në Porto Romano dhe Marina. Ato do të transformojnë rrënjësisht infrastrukturën portuale, duke e bërë Portin e Durrësit dhe Porto Romanon më konkurrues, më të qëndrueshëm dhe më të integruar me zhvillimet rajonale e ndërkombëtare.”
Përmes paneleve, ekspozitave dhe prezantimeve, vizitorët u njohën me të shkuarën, të tashmen dhe të ardhmen e sektorit detar, ndërsa një vend të veçantë zuri edhe frymëzimi i brezit të ri që e shikon detin jo vetëm si pjesë të historisë, por edhe si një mundësi për të ndërtuar karrierën e tyre.
R. N.
©️zërionline
