Dita e Verës ka nisur plot diell në Durrës, duke i dhënë qytetit një atmosferë të gjallë pranverore. Sheshi kryesor është kthyer në një hapësirë festive, i dekoruar me çadra shumëngjyrëshe, lule dhe elemente simbolike që sjellin ngjyrat e stinës së re.
Qytetarë të shumtë, familje dhe të rinj kanë zgjedhur të kalojnë orët e paradites në bregdet, por edhe në shesh, ku është organizuar edhe një panair i vogël me artizanë. Ata kanë ekspozuar punimet e tyre tradicionale, nga suvenire artizanale e deri te zbukurime të ndryshme, duke sjellë një atmosferë tipike pranverore dhe duke promovuar mjeshtërinë vendase.
Në këtë festë nuk mungojnë as simbolikat e saj më të njohura. Qytetarët ndalen për të provuar embëlsirën tradicionale të Ditës së Verës, ndërsa shumë prej tyre lidhin edhe veroret, byzylykët simbolikë të kuq e të bardhë që, sipas traditës, sjellin fat dhe mbarësi gjatë stinës së pranverës dhe duhen hequr sapo shikon dallëndyshen e parë.
Dita e Verës është një festë popullore me rrënjë të lashta, e lidhur me ardhjen e pranverës dhe rigjallërimin e natyrës. Ajo festohet prej shekujsh në trevat shqiptare si një moment gëzimi, shprese dhe fillimi të një cikli të ri në natyrë dhe në jetën e njerëzve. Zonat me traditën më të konsoliduar të festimeve janë Elbasani dhe Dibra.
Në Durrës, kjo ditë ka mbledhur qytetarët në shesh e bregdet, mes ngjyrave të luleve dhe atmosferës festive që paralajmëron zyrtarisht ardhjen e pranverës.
©️zërionline
