Këshilltarët demokratë të Bashkisë Durrës padisin në gjykatë Bashkinë Durrës dhe Këshillin Bashkiak për parkimin me pagesë në rrugët e sheshet publike.
Lajmi u bë i situr nga Joni Myshketa në rrjetin social Facebook. Ai ka shprehur sërish kundërshtimin e tij të fortë ndaj vendimit për parkim me pagesë në qytet. Ai thekson se ky vendim është i nxituar dhe është miratuar pa bërë transparencën e duhur për qytetarët.
Myshketa ka kritikuar mungesën e transparencës në miratimin e këtij vendimi dhe ka bërë me dije se, pas refuzimit të kërkesës së tyre për mospranimin e aktit normativ nga Prefekti i Qarkut Durrës, ai së bashku me Blerina Reçi, Sami Osmani dhe Samet Vata kanë dorëzuar një kërkesë padi në Gjykatën Administrative të Apelit në Tiranë. Kjo kërkesë synon shfuqizimin e aktit normativ që vendos parkingjet me pagesë.
Myshketa thekson se veprimet e tij dhe të grupit të këshilltarëve demokratë janë në përputhje të plotë me retorikën e tyre politike, duke mbrojtur interesat e qytetarëve durrsakë. Sipas Myshketës, projekti është kundër interesave të qytetit, pasi është miratuar pa shqyrtuar të gjitha alternativat e mundshme për qytetarët.
Duke përfunduar, Myshketa shpreh besimin për një vendim të drejtë nga Gjykata, duke theksuar se ai dhe grupi i tij do të mbeten gjithmonë në shërbim të Durrësit dhe banorëve të tij, përballë çdo abuzimi me të drejtat e tyre.
@zërionline
