Një hajdut serial me precedentë të theksuar për vjedhje në disa qarqe të vendit u kap dhe arrestua nga policia, pas një operacioni të shpejtë dhe të koordinuar. 29-vjeçari nga Skrapari, Teki Halilaj, i cili njihet për veprimtarinë e tij kriminale, u ndalua në kohë rekord pasi vodhi një automjet në lagjen nr.13 në zonën e plazhit të Durrësit dhe u drejtua për në Elbasan.
Ngjarja filloi më 14 gusht, kur dy qytetarë kallëzuan në polici vjedhjen e një automjeti dhe të sendeve personale në dy incidente të veçanta. Halilaj, pasi kishte grabitur makinën dhe një celular nga një shtetas shqiptar në lagjen nr.13, nuk u ndal me kaq. Në të njëjtën ditë, ai arriti të vidhte edhe çantën me para dhe sende personale të një turisti nga Bosnje Hercegovina, i cili qëndronte në një hotel në lagjen nr.14.
Falë reagimit të shpejtë të Komisariatit të Policisë së Durrësit dhe shkëmbimit të informacionit me Policinë e Elbasanit, u bë e mundur ndalimi i të dyshuarit, pikërisht gjatë tentativës së tij për t’u larguar me automjetin e vjedhur. Operacioni i koduar “Saga” rezultoi i suksesshëm, duke vënë në pranga një kriminel të rrezikshëm që ishte në kërkim edhe nga Policia e Tiranës për katër vjedhje të mëparshme.
Gjatë operacionit, policia sekuestroi automjetin e vjedhur, dy telefona, një medalion floriri, një parfum dhe një palë syze, të gjitha këto të dyshuara si të përfituara nga veprimtaria e tij kriminale. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, ku pritet të vijojnë hetimet për veprimtari të mëtejshme.
@zërionline
