Gjykata e Posaçme Kundër Korrupsionit dhe Krimit të Organizuar (GJKKO) ka shpallur fajtorë 28 persona të akuzuar si pjesë e një grupi të strukturuar kriminal që organizonte kalimin e paligjshëm të emigrantëve drejt vendeve të ndryshme të botës.
Me vendimin e dhënë nga trupa gjykuese e përbërë nga Erjon Bani, Irena Gjoka dhe Atalanda Zeqiraj, të dënuarit morën në total rreth 155 vite burg.
Sipas hetimeve të Prokurorisë së Posaçme (SPAK), grupi kriminal organizonte kalimin e paligjshëm të emigrantëve kundrejt pagesave që arrinin në mijëra euro, duke përdorur skema të mirëorganizuara dhe dokumente të falsifikuara.
Të pandehurit u shpallën fajtorë për veprat penale “Ndihma për kalim të paligjshëm të kufijve”, “Falsifikimi i letërnjoftimeve, pasaportave ose vizave”, “Grupi i strukturuar kriminal”, “Kryerja e veprës penale nga organizata kriminale dhe grupi i strukturuar kriminal”, si edhe “Shpërdorimi i detyrës”.
Mes të dënuarve janë: Njazi Ademaj, Ylli Brahimaj, Rrezart Domi, Osman Luca, Artur Mici, Arsen Caka, Jugert Gashi, Emiljan Marashi, Amarildo Luca, Robert Gjika, Roland Islamaj, Xhelal Krasniqi, Fitim Rama, Gridi Elezi, Maksim Domi, Dritan Cena, Redi Salaj, Behar Nuhiallari, Behar Rexha, Deila Qama, Arnold Shahu, Ylli Çaushaj, Artid Shtylla, Murat Gjuniku, Bardhyl Imeri, Bajram Xhaja, Besnik Lumaj, Altin Neli, Fatmir Stankova, Arben Rushiti, Leonardo Lama, Xhelil Alla dhe Perlat Canaj.
©ZëriOnline
