Një konflikt për motive të dobëta në orët e para të mëngjesit rrezikoi të përfundonte në tragjedi në Rrogozhinë. Një 26-vjeçar nga Peqini dyshohet se ka nxjerrë kallashnikovun dhe ka kanosur për vrasje një 35-vjeçar nga Tirana.
Ngjarja ndodhi rreth orës 01:00, ndërsa alarmi i dhënë në polici vuri menjëherë në lëvizje shërbimet e Komisariatit të Kavajës dhe Stacionit të Policisë Rrogozhinë.
Policia arriti të lokalizojë banesën ku ndodheshin personat e përfshirë në konflikt. Gjatë kontrollit, efektivët gjetën armën e zjarrit tip kallashnikov dhe municion luftarak, të cilat u sekuestruan si prova materiale.
Në pranga përfundoi 26-vjeçari Amarildo Ibrahimi, banues në Peqin, i akuzuar për armëmbajtje pa leje dhe kanosje. Sipas policisë, ai kishte kërcënuar me vrasje 35-vjeçarin A. S., i cili po shkonte drejt banesës së një 36-vjeçareje në Rrogozhinë.
Në banesë ndodhej edhe një 21-vjeçar, i cili u arrestua gjithashtu, nën dyshimin se nuk kishte kallëzuar ngjarjen në polici.
Ndërkohë, 36-vjeçarja është proceduar penalisht në gjendje të lirë. Sipas policisë, ajo nuk ndodhej në banesë në momentin kur ndodhi konflikti.
Ndërhyrja e shpejtë e policisë bëri që situata të mos përshkallëzohej më tej. Kallashnikovi dhe municioni do t’i nënshtrohen ekspertizës kriminalistike, ndërsa materialet i janë dërguar Prokurorisë së Durrësit për veprime të mëtejshme.
©ZëriOnline
