Në datat 5 dhe 6 tetor 2024, Banka e Shqipërisë dhe Qeveria Shqiptare bashkuan forcat për të organizuar “Shkollën Rinore për Edukimin Financiar”, një nismë e re që synon t’u japë të rinjve njohuritë e nevojshme për të menaxhuar financat e tyre. Aktiviteti, që u mbajt në selinë e Bankës së Shqipërisë, mblodhi rreth 60 gjimnazistë nga qarqet e Tiranës, Durrësit dhe Elbasanit, duke u ofruar atyre një mundësi unike për t’u pajisur me aftësi të vyera financiare.
Guvernatori i Bankës së Shqipërisë, Gent Sejko, në fjalën e tij përshëndetëse, vuri theksin te rëndësia e fillimit të edukimit financiar që në moshë të re.
“Njohuritë mbi financat janë një investim jetik për të ardhmen. Të rinjtë duhet të mësojnë jo vetëm si të kursejnë dhe shpenzojnë me mençuri, por edhe të kuptojnë teknologjitë moderne të pagesave digjitale që tashmë janë pjesë e jetës së përditshme,” tha Sejko.
Ky aktivitet, i zhvilluar në kuadër të nismës kombëtare për edukimin financiar, synon të krijojë një gjeneratë të re të rinjsh të përgatitur për sfidat e menaxhimit të financave personale, ndërkohë që nisma pritet të zgjerohet më tej dhe të integrohet në kurrikulat shkollore në të gjithë vendin.
Ministrja e Shtetit për Rininë dhe Fëmijët, Bora Muzhaqi, dhe Zëvendësguvernatorja Minxhozi, nënvizuan rëndësinë e vazhdimit të kësaj nisme, duke e quajtur edukimin financiar “një çelës të pavarësisë personale dhe zhvillimit të qëndrueshëm ekonomik”.
Në përfundim të programit dyditor, të rinjtë pjesëmarrës u nderuan me certifikata për përkushtimin e tyre dhe përvetësimin e aftësive financiare.
Me suksesin e këtij programi pilot, Shqipëria duket e gatshme të nisë hedhjen e themeleve të forta për një shoqëri me njohuri më të thella financiare dhe të ardhme më të sigurt ekonomike për të rinjtë e saj.
©️zërionline
