Një i mitur ka humbur jetën në spital pasi është goditur disa herë me thikë. Ngjarja e rëndë ka ndodhur rreth orës 19:30 të mbrëmjes, në zonën e Fermentimit, lagjja “Skënderbeg” në Shkodër. Një i mitur 15-vjeçar, I identifikuar si Emiljano Gjoni ka humbur jetën si pasojë e plagëve të marra nga një sulm me mjet prerës i llojit thikë. Sipas të dhënave paraprake, dyshohet se ngjarja ka ndodhur gjatë një konflikti për motive të dobëta me një person ende të paidentifikuar nga policia.
Shërbimet e Policisë mbërritën menjëherë në vendngjarje dhe janë duke punuar intensivisht për identifikimin dhe kapjen e autorit. Viktima u transportua në Spitalin Rajonal të Shkodrës, ku fatkeqësisht ndërroi jetë për shkak të plagëve të rënda.
Ngjarja e rëndë që i mori jetën 15-vjeçarit në Shkodër ka tronditur komunitetin lokal, duke lënë pas dhimbje dhe pikëllim të thellë. Ka qenë një konflikt për motive të dobëta, që përfundoi në një sulm të dhunshëm me thikë, duke shënuar një tjetër tragjedi që ngre shqetësime mbi sigurinë e të rinjve dhe ndalimin e akteve të dhunës. Ndërsa hetimet vijojnë për të identifikuar autorin dhe për të hedhur dritë mbi rrethanat e ngjarjes, kjo humbje e parakohshme duhet të kthehet në një thirrje për ndërgjegjësim më të madh dhe përpjekje më serioze për parandalimin e ngjarjeve të tilla tragjike.
©️zërionline
