Nuk zgjati shumë “gjendja shëndetësore” që u përmend si arsye për dorëzimin e mandatit, pasi Prokuroria e Posaçme Kundër Korrupsionit dhe Krimit të Organizuar (SPAK) arrestoi ish-deputetin socialist Jurgis Çyrbja. Përveç akuzës për shpërdorim detyre, Çyrbja përballet me dy akuza të tjera, të cilat sipas burimeve ende jo zyrtare dyshohet të jenë nxjerrje e sekretit hetimor dhe përkrahje të autorit të krimit.
Dyshimet lidhen me mbështetjen e një grupi kriminal që dyshohet se ish-deputeti e ka ndihmuar në përhapjen e informacioneve të klasifikuara. Në lidhje me këtë çështje, SPAK ka lëshuar gjithsej tre urdhër-arreste: përveç Çyrbjas, është arrestuar edhe një person tjetër, ndërsa një i tretë është shpallur në kërkim.
Akuzat janë bazuar në të dhëna të përfituara nga rrjeti i komunikimit të koduar Encrochat, ku Çyrbja dyshohet se ka qenë i përfshirë në mënyrë aktive. Ndërkohë akuza për shpërdorim detyre dhe favorizim të E. Shullazit për pronat lidhet me periudhën kur Çyrbja mbante detyrën e kreut të hipotekës në Durrës.
©️zërionline
