Anija “Moliva,” e ngarkuar me mbetje të dyshuara toksike, vazhdon të qëndrojë në radën e jashtme të Portit të Durrësit, teksa autoritetet ende nuk kanë marrë një vendim për vendin e ankorimit të saj. Përpjekjet për ta zhvendosur atë në Porto Romano kanë dështuar, pasi autoritetet e portit MBM refuzuan kërkesën për ta pranuar ngarkesën e rrezikshme dhe që kërkon kushte tê veçanta sigurie. Kjo ka bërë që anija të mbetet në pritje të një vendimi për të gjetur një zgjidhje të sigurt për këtë situatë delikate.
Në bord ndodhen 102 kontejnerë me mbetje, ndërsa 97 kontejnerë të tjerë janë në pritje për shkarkim, të destinuar për kompani private. Ndërkohë, pavarësisht se radha për t’u futur në port i përkiste anijes turke, një tjetër anije me kontejnerë nga Pireu u ankorua, duke bërë që “Moliva” të mbetet në pritje të një vendimi përfundimtar.
Në një zhvillim të fundit, mësohet se Autoriteti Portual i Durrësit i ka kërkuar Prokurorisë së Durrësit që të marrë një vendim mbi vendin ku do të shkarkohen kontejnerët, për shkak të dyshimeve mbi përmbajtjen e tyre. Ky hap synon të sigurojë që procesi i shkarkimit dhe depozitimit të mbetjeve të bëhet në kushte të sigurta dhe në përputhje me standardet e mbrojtjes së mjedisit dhe shëndetit publik.
Autoritetet mjedisore dhe hetuesit presin të analizohet përbërja e këtyre mbetjeve, për të garantuar që ato nuk përbëjnë rrezik për mjedisin dhe komunitetin përreth. Situata mbetet në vëzhgim të vazhdueshëm, ndërsa qytetarët dhe organizatat mjedisore kanë shprehur shqetësimin për ndikimin e mundshëm që këto mbetje mund të kenë.
©️zërionline
