Në kuadër të festimeve të nëntorit, teatri “Aleksandër Moisiu” në Durrës hapi dyert për koncertin festiv “Këngët e Vendit Tim”, një homazh artistik me rastin e 80-vjetorit të Çlirimit dhe 112-vjetorit të Pavarësisë.
Nën udhëheqjen artistike të mezzo sopranos Olta Juba, dirigjimin e Orges Memës dhe moderimin e Adelina Gjojdeshit, koncerti ngjiti në skenë disa nga talentet më të spikatura të qytetit që sollën plot freski këngë të mirënjohura të muzikës sonë.
Tingujt e Orkestrës frymore, harmonia e Korit të të rinjve dhe energjia e solistëve dhe e kërcimtarëve krijuan një atmosferë të bukur që përfshiu të gjithë të pranishmit në sallë. Interpretimet përçuan krenarinë kombëtare dhe gjallëruan traditat, duke sjellë një buqetë këngësh të mirënjohura dhe nga festivalet në RTSH dhe duke marrë duartrokitje nga publiku.
Koncerti u organizua nga bashkia e Durrësit, qendra kulturore “A. Moisiu” dhe ZVA Durrës. Hyrja e lirë mundësoi pjesëmarrjen masive të qytetarëve, të cilët përjetuan një mbrëmje të bukur kuqezi.
Koncerti ishte dhe një moment i çmuar reflektimi dhe festimi përmes artit, duke forcuar ndjenjën e përkatësisë dhe krenarisë kombëtare.
©️zërionline
