Xhamia e Ballies në Elbasan, një monument me histori dhe arkitekturë të jashtëzakonshme, pasi u përzgjodh ndër pesë objektet e kultit më të bukura në botë, fitoi çmimin prestigjioz “Ndërtesa e Vitit 2025” nga ArchDaily. Kryeministri Edi Rama ka ndarë sot disa foto të saj, duke vënë në dukje rëndësinë dhe vlerën unike të këtij objekti për trashëgiminë kulturore dhe arkitektonike shqiptare.
E ndërtuar fillimisht në vitin 1608, kjo xhami ishte një nga ndërtesat më të bukura të kohës, jo vetëm në Shqipëri, por edhe përtej kufijve të saj. E shembur gjatë regjimit komunist, ajo u rindërtua në vitin 2022 me një dizajn inovativ që ndërthur arkitekturën moderne me elementët tradicionalë të besimit islam.
Hartuesit e projektit kanë arritur të krijojnë një hapësirë unike dhe frymëzuese, ku tradita dhe bashkëkohorja bashkëjetojnë në harmoni të plotë. Ky vlerësim ndërkombëtar e bën Xhaminë e Ballies të vetmen godinë kulti në të gjithë Europën që arrin në pesëshen finale të këtij çmimi prestigjioz, duke e vendosur Shqipërinë në hartën e arkitekturës botërore.
©️zërionline
