Gjatë natës së kaluar, dy automjete janë përfshirë nga flakët në zonën e njohur si ish-URT në qytetin e Durrësit. Makinat ishin të parkuara pranë njëra-tjetrës dhe ngjarja dyshohet të jetë rezultat i një akti të qëllimshëm zjarrvënieje. Një nga këto automjete, një fuoristradë, i përkiste kryeinxhinierit të OSHEE-së, Arben Alushi. Paraprakisht dyshohet se ky incident mund të jetë i lidhur me detyrën e tij.
Sipas hetimeve të para, zjarri iu vu automjetit te Alushit dhe më pas u përhap në makinën tjetër, duke shkaktuar dëme të konsiderueshme. Policia ka nisur një hetim të plotë dhe po kqyr kamerat e sigurisë në zonë për të zbardhur dinamikën e ngjarjes dhe për të identifikuar autorët e mundshëm. Ky incident ngre shqetësime serioze për sigurinë publike.
Burime policore shprehen se po punohet për të zbuluar të gjitha detajet e kësaj ngjarjeje dhe për të dërguar para drejtësisë personat përgjegjës.
@zërionline
