Me urdhër të SPAK prangoset kryekomisari i policisë në Durrës. Agjencia e Mbikëqyrjes Policore për Rajonin Durrës-Kavajë, në bashkëpunim me Prokurorinë e Posaçme Kundër Korrupsionit dhe Krimit të Organizuar (SPAK), ka arrestuar në flagrancë Kryekomisarin Gazmir Preçi, i cili shërbente si Shef i Sektorit kundër Trafiqeve dhe Narkotikëve në Drejtorinë Vendore të Policisë Durrës. Kryekomisari është i dyshuar për veprat penale “Shpërdorim detyre” dhe “Korrupsion pasiv i personave që ushtrojnë funksione publike”.
Arrestimi i tij u krye pas hetimeve intensive të udhëhequra nga SPAK, të cilat përfshinë përdorimin e metodave speciale të hetimit. Gjatë këtyre hetimeve, janë siguruar prova që tregojnë se Kryekomisari Gazmir Preçi, duke shfrytëzuar pozitën e tij, i kishte kërkuar një biznesmeni në Durrës shumën prej 20 mijë eurosh. Në fazën e parë, ai ka marrë një pagesë prej 10 mijë eurosh nëpërmjet shantazhit, duke kërcënuar me bllokimin e aktivitetit të biznesit të shtetasit në fjalë.
Gjatë arrestimit, autoritetet kanë sekuestruar si prova materiale shumën prej 10 mijë eurosh, dokumente që lidhen me ngjarjen dhe dy aparate celularë.
Hetimet po vijojnë për të dokumentuar plotësisht ngjarjen dhe për të identifikuar ndonjë punonjës tjetër të përfshirë në këtë rast.
@zërionline
