Gjykata e Shkallës së Parë në Durrës ka vendosur të lirojë me garanci pasurore reperin e njohur Rigels Rajku, i njohur si Noizy. Vendimi u mor sot dhe pritet që Rajku të paguajë shumën prej 5 milionë lekësh, për të shmangur masën e arrestit me burg të kërkuar nga Prokuroria.
Sipas Prokurorisë dhe Policisë së Kosovës, Noizy, së bashku me DJ-in e tij dhe disa persona të tjerë, dyshohet se kanë ushtruar dhunë ndaj Medi Isenit, i njohur në TikTok si “Medi”, dhe mikut të tij, Bekim Hadergjonaj. Incidenti ndodhi në orët e para të mëngjesit të 2 gushtit në një klub nate në Pejë, ku të dy grupet ndodheshin për arsye të ndryshme.
Pas këtij incidenti, Medi Iseni bëri kallëzim penal në Policinë e Kosovës ndaj Noizyt, Arkimed Lushajt (i njohur si “Stresi”), dhe Baftjar Bajraktarit. Konflikti dyshohet se ka lindur për shkak të videove të publikuara nga Iseni në TikTok, ku reperët Noizy dhe Stresi ofendohen.
Gjykatësi Shkëlzen Liçaj, pasi shqyrtoi çështjen, vendosi që të pranojë kërkesën e Prokurorisë për caktimin e masës së sigurimit që ishte arrest në burg për arsye ekstradimi, po pas kërkesës së mbrojtjes dhe akuza ra dakord për caktimin e “Garancisë Pasurore” si një alternativë ndaj masës arrest me burg për Rigels Rajkun.
Gjykata caktoi shumën e garancisë pasurore në 5 milionë lekë, të cilën Rajku duhet ta depozitojë brenda pesë ditëve. Deri në depozitimin e shumës, ai do të qëndrojë në gjendje arresti dhe vetëm pas depozitimit të shumës, prokurori i çështjes duhet të verifikojë dokumentacionin dhe të urdhërojë lirimin e menjëhershëm të Rajkut, ose të konfirmojë masën e arrestimit me burg, nëse ka ndonjë parregullsi.
Gjithashtu, vendimi i gjykatës do t’i njoftohet menjëherë Ministrit të Drejtësisë së Shqipërisë, ndërsa palët kanë të drejtë ankimi brenda pesë ditëve nga marrja e njoftimit.
@zërionline
