Rama forcon pozitat e kryebashkiakes së Durrësit në politikë. I beson qarkun e Durrësit për zgjedhjet e ardhshme. Në Asamblenë e Partisë Socialiste të zhvilluar këtë të diel në Durrës, Kryeministri Edi Rama bëri të ditur emrat e drejtuesve politikë që do të drejtojnë çdo qark për zgjedhjet e ardhshme parlamentare. Ndryshimet e bëra në strukturën e drejtuesve politikë tregojnë për një riorganizim të rëndësishëm brenda PS-së, për të forcuar praninë e partisë në çdo qark.
Për qarkun e Tiranës, përgjegjësinë politike do ta mbajnë tre figura të rëndësishme të PS-së, Elisa Spiropali, Ogerta Manastirliu dhe kryebashkiaku Erion Veliaj. Ky kombinim tregon për një përqendrim të burimeve në kryeqytet, duke qenë se Tirana është një ndër qendrat më të rëndësishme elektorale në vend.
Ndërkohë, ka pasur edhe disa ndryshime të tjera të rëndësishme. Belinda Balluku, e cila më parë drejtonte qarkun e Dibrës, do të transferohet në Fier, ndërsa vendin e saj në Dibër do ta zërë Blendi Gonxhe. Ky ndryshim sinjalizon një riorganizim strategjik të Partisë Socialiste në këto dy qarqe.
Një vendim i veçantë ishte caktimi i Taulant Ballës si drejtues politik për votën e diasporës, një segment që po fiton gjithnjë e më shumë rëndësi në zgjedhjet e ardhshme.
Drejtuesit politikë për çdo qark janë si më poshtë:
- Tiranë – Elisa Spiropali, Ogerta Manastirliu dhe Erion Veliaj
- Durrës – Emirjana Sako
- Shkodër – Benet Beci
- Lezhë – Ulsi Manja
- Kukës – Pandeli Majko
- Elbasan – Arbian Mazniku
- Fier – Belinda Balluku
- Korçë – Niko Peleshi
- Gjirokastër – Mirela Kumbaro
- Berat – Ervin Demo
- Vlorë – Bledi Çuçi
- Dibër – Blendi Gonxhe
Ky riorganizim ka për qëllim forcimin e pozicioneve elektorale të Partisë Socialiste, duke përgatitur terrenin për një fushatë të fuqishme në zgjedhjet e ardhshme.
©️zërionline
