Më 13 shtator, Teatri “Aleksandër Moisiu” në Durrës do të mirëpresë një ngjarje të veçantë kulturore, Koncertin e Perlave të Muzikës Turke, që do të fillojë në orën 20:00. Ky koncert do të sjellë për publikun shqiptar disa nga veprat më të spikatura të kompozitorëve të njohur turq, Ahmet Adnan Saygun dhe Ulvi Cemal Erkin, dy pionierë në fushën e muzikës klasike turke.
Artistët e Teatrit të Operas dhe Baletit të Stambollit do të interpretojnë pjesë që përfshijnë melodi popullore nga të gjitha rajonet e Anadollit, duke prezantuar karakterin e pasur të muzikës popullore turke në një nivel universal. Ky koncert synon të krijojë një përvojë të paharrueshme për dashamirësit e muzikës, duke shpalosur magjinë dhe emocionet që vetëm tingujt muzikorë mund të dhurojnë.
Java kulturore turke premton të jetë një mundësi e mirë për të përjetuar kulturën dhe muzikën e pasur turke. Publiku durrsak, po dhe të huajt që ndodhen në Durrës pritet të shijojnë një natë të mbushur me muzikë dhe ritme të njohura e të panjohura për ta.
©️zërionline
