Sapo ka zbritur në Rinas, prangat janë shtrënguar në duart e një 33-vjeçari nga Lushnja, me nënshtetësi edhe italiane, i cili akuzohet për abuzim seksual me vajzën e mitur të kushërirës së bashkëshortes sê tij.
Verën e vitit të kaluar, e mitura, edhe ajo me nënshtetësi italiane, kishte shkuar tek halla në Golem të Kavajës ku dhe ka ndodhur abuzimi. Më parë abuzuesi duke përfituar nga lidhja familjare e kishte kontaktuar vajzën edhe në Instagram duke i thënë se ajo e tërhiqte seksualisht që kur ishte e vogël dhe ai e mbante në prehër e gjoja përkujdesej për të.
Në kuadër të operacioneve të vazhdueshme për kapjen e personave të shpallur në kërkim, dhe bazuar në inteligjencën policore se një i kërkuar do të hynte në Shqipëri përmes Pikës së Kalimit Kufitar (PKK) të Rinasit, shërbimet e Policisë së Kavajës, në bashkëpunim me ato të Policisë Kufitare të Rinasit, arrestuan në hyrje të aeroportit shtetasin Elton Sina, 33 vjeç, banues në Çermë, Lushnjë.
Ky shtetas ishte shpallur në kërkim në vitin 2023, pasi Gjykata e Shkallës së Parë e Juridiksionit të Përgjithshëm Durrës kishte caktuar ndaj tij masën e sigurisë “Arrest në burg” për veprën penale “Marrëdhënie seksuale ose homoseksuale me të mitur”.
Në gusht 2023, dyshohet se E. Sina ka abuzuar seksualisht me një të mitur, rast ky i denoncuar edhe në emisionin investigativ “Piranjat” më 13 shtator 2024. Emisioni ka ndikuar për të shkundur autoritetet dhe ndjekur një histori në dukje të harruar prej tyre.
Policia falënderoi gazetarët e emisionit investigativ për denoncimin e rastit dhe inkurajon qytetarët dhe median që të raportojnë çdo shkelje ligjore që hasin. Reagimi ndaj autorëve të këtyre veprave do të jetë i shpejtë dhe i vendosur, duke ndjekur ashpërsinë e ligjit.
Ndërkohë materialet procedurale ndaj Sinës i janë referuar Prokurorisë pranë Gjykatës së Shkallës së Parë Durrës, për veprime të mëtejshme ligjore.
©️zërionline
