Një 48-vjeçar nga Durrësi u arrestua në tentativë për të dalë jashtë vendit, teksa ishte në kërkim për një tentativë për vrasje të kryer me armë zjarri një vit më parë. Operacioni u zhvillua në kuadër të megaoperacionit policor të koduar “Sundimi i ligjit”, i cili synon lokalizimin dhe arrestimin e personave në kërkim.
I dyshuari, F. K., u kap nga shërbimet e Policisë Kufitare në pikën kufitare të Morinës, ndërsa përpiqej të largohej nga Shqipëria. Komisariati i Policisë Durrës, pas koordinimit të verifikimeve dhe informacioneve, bëri të mundur arrestimin e tij.
Gjykata e Durrësit kishte lëshuar më parë urdhrin e arrestit ndaj tij, duke caktuar masën e sigurisë “Arrest në burg” për veprat penale “Vrasja me dashje”, e mbetur në tentativë, dhe “Mbajtja pa leje dhe prodhimi i armëve, armëve shpërthyese dhe municionit”. Ngjarja për të cilën akuzohet 48-vjeçari kishte ndodhur në vitin 2023, ku dyshohet se ai qëlloi me armë zjarri në drejtim të një automjeti në lagjen nr. 8 të Durrësit, pas një konflikti për motive të dobëta. Fatmirësisht, nga të shtënat nuk pati të dëmtuar.
Materialet procedurale janë dërguar tashmë në Prokurorinë pranë Gjykatës së Shkallës së Parë Durrës, për vijimin e hetimeve.
©️zërionline
