Astrologu i njohur korçar, Jofiel Koço, 53 vjeç, i dha fund jetës mëngjesin e sotëm duke u hedhur nga tarraca e një pallati 7-katësh pranë Pazarit të Korçës. Sipas raportimeve paraprake, Koço ishte ngjitur në tarracën e pallatit ku banonte i vetëm dhe prej andej është hedhur, duke rënë fillimisht mbi çatinë e një ndërtese fqinje dhe më pas në asfalt, ku humbi jetën në vend.
Jofiel Koço ishte një figurë e njohur në media, shpesh i ftuar në emisione televizive për të interpretuar yjet dhe për të diskutuar tema si jeta jashtëtokësore. Ai pretendonte se kishte korrespondencë me astrologë të tjerë në SHBA dhe Izrael mbi këto çështje.
Ai kishte mbaruar shkollën e mesme artistike “Jan Kukuzeli” në qytetin e Durrësit për skulpturë.
Policia ka nisur hetimet për të zbardhur shkaqet e kësaj ngjarjeje tragjike, e cila ka tronditur banorët dhe tregtarët e zonës. Sipas njoftimit zyrtar, “ngjarja ndodhi mëngjesin e sotëm, në lagjen nr.8, nga ku dyshohet se 53-vjeçari është vetëhedhur nga tarraca e katit të shtatë të një pallati”.
©️zërionline
