Një 38-vjeçar nga Durrësi i është drejtuar policisë vendore për ndihmë, pasi bashkëshortja e tij është larguar nga banesa. Sipas deklaratave të dhëna nga burri, gruaja, Isnie Selxhaferri, 38 vjeçe, u largua mëngjesin e 5 nëntorit dhe që atëherë nuk ka më asnjë lajm.
Policia e Durrësit konfirmon se po punon për gjetjen e saj, ndërsa shqetësimi i familjarëve është rritur pasi gruaja është nënë e dy fëmijëve, ku njëri prej tyre është vetëm një muajsh. Sipas të dhënave të para, dyshohet se largimi i saj mund të ketë ndodhur për shkak të një gjendjeje depresive pas lindjes, e njohur si depresioni post-partum.
Depresioni post-partum është një gjendje e rëndë emocionale që prek shumë gra pas lindjes, duke shkaktuar luhatje të forta emocionale dhe ndjesi të trazuara, që mund të ndikojnë në sjelljen e përditshme të tyre. Kjo gjendje shpesh ka nevojë për mbështetje dhe trajtim të specializuar, dhe largimi i saj ka alarmuar të afërmit dhe autoritetet.
Policia u bën thirrje qytetarëve që, nëse kanë informacion për vendndodhjen e saj, të kontaktojnë menjëherë me ta, me qëllim që kjo nënë të rikthehet pranë familjes.
©️zërionline
