Vrau me çekiç bashkëshorten, Kastriot Cenko ka rrëfyer krimin në policinë greke, por duke lënë të pazbardhur të vërtetën e asaj nate dhe një jete të humbur pakthim.
Akti brutal u zhvillua brenda katër mureve të një shtëpie që deri atëherë dukej e qetë. Kastriot Cenko, 39 vjeç, vrau bashkëshorten e tij Alba Cenko, në një episod dhune të paparë, duke përdorur një çekiç dhe kabllon e një karikuesi celular.
Në rrëfimin e tij tronditës, Kastriot Cenko përshkruan momentet e fundit para aktit fatal. Teksa fëmijët flinin të qetë në dhomat e tyre, ai u zgjua rreth orës 01:30 dhe vuri re se gruaja nuk ishte në shtrat. E gjeti në banjë, duke folur në telefon. Aty, dëgjoi një bisedë që do të ndryshonte gjithçka, sipas tij. Zëri i një burri tjetër në linjë dhe deklarata e gruas së tij se planifikonte të largohej, duke marrë me vete djalin e madh, ndezën një shpërthim emocionesh tek ai.
“Nuk është fëmija yt,” kishte thënë gruaja, duke shtuar se vetëm djali i vogël ishte i tij. Këto fjalë u bënë nxitësi i një akti të pakontrolluar. “Në atë moment u hutova plotësisht,” ka rrëfyer Kastrioti. Ai mori çekiçin dhe e goditi në kokë, duke i shkaktuar plagë fatale. Pavarësisht se gruaja ra pa ndjenja, ai përdori kabllon e një karikuesi për ta mbytur dhe e mbështolli trupin për të fshehur gjurmët.
Dy fëmijët e çiftit, vetëm 9 dhe 12 vjeç, ishin në shtëpi gjatë gjithë kohës, por në gjumë. Për të shmangur çdo dyshim, Kastrioti i dërgoi në shtëpinë e vëllait, duke inskenuar një skenar të ftohtë për të mbuluar krimin. Ai u shkroi një mesazh duke u shtirur si nëna e tyre:
“Mami u largua… tani jam në Patra dhe nuk do të kthehem më. Kujdesuni për njëri-tjetrin dhe dëgjoni babin.”
Në mesazhin e tij, ai krijoi një narrativë të detajuar, duke u përpjekur të mbante gjallë idenë se nëna e tyre kishte vendosur të largohej. Të njëjtën lojë, luajti dhe me familjarët e Albës. Por pas kësaj loje të manipuluar fshihej një realitet i tmerrshëm.
Ky krim barbar ka nxitur një valë debatesh mbi dhunën në familje dhe shkaqet që çojnë në akte kaq ekstreme. Ishte xhelozia, tradhtia apo ndonjë tension i pazgjidhur ndër vite që çoi në këtë tragjedi?
Pavarësisht motiveve, e vërteta mbetet e pandryshuar: dy fëmijë mbetën pa nënë dhe pa një të ardhme normale.
Ngjarja e Kastriot Cenko nuk është vetëm një krim që tronditi familjen e tij, por edhe një sinjal alarmi për shoqërinë për të adresuar më me forcë dhunën dhe konfliktet brenda familjes.
©️zërionline
