Një incident ka ndodhur gjatë manovrave të tragetit “AF Francesca” për t’u ankoruar në kalatë. Helika e tij ka kapur spirancën e tragetit “Rigel III”, i cili ishte ankoruar më parë në të njëjtën zonë. Për pasojë, helika e “AF Francesca” është dëmtuar, duke diktuar që trageti të kryejë sot një lundrim pa pasagjerë, për shkak të dëmtimit të helikës dhe kushteve të vështira atmosferike.
Sipas parashikimeve të Kapitenerisë së Portit të Durrësit për situatën hidrometeorologjike në Rajonin e Adriatikut, kushtet e përkeqësuara të motit kanë shkaktuar vonesa në mbërritjen, nisjen dhe proceset e bregëzimit të trageteve.
Kompanitë e lundrimeve njoftojnë se trageti “AF Marina”, i planifikuar për të lundruar sot mesditën nga Porti i Durrësit drejt Barit (Itali), ka pezulluar nisjen deri në përmirësimin e kushteve atmosferike.
Nga ana tjetër, trageti “AF Francesca” do të kryejë lundrim pa pasagjerë për shkak të dëmtimit të helikës.
Në terminalin e kontenierëve, proceset operacionale po vijojnë normalisht dhe pa ndërprerje.
Ndërkohë, puna në terminalin e mallrave gjenerale dhe atë të rifuxhos është pezulluar përkohësisht për shkak të erës së fortë dhe reshjeve intensive.
©️zërionline
