Qendra e verifikimit të fakteve Faktoje.al prezantoi të hënën në Durrës raportin mbi “Transparencën dhe mbajtjen e premtimeve”, pas një viti monitorimi të punës së Bashkisë Durrës dhe Bashkisë Kavajë. Në aktivitet morën pjesë përfaqësues të Këshillit Bashkiak, gazetarë lokalë dhe shoqëria civile, ndërsa bashkitë e monitoruara nuk ishin të pranishme, pavarësisht ftesës për pjesëmarrje. Monitorimi u krye në kuadër të projektit “40 premtime, 10 bashki”, mbështetur nga organizata NED për të tretin vit radhazi. Për vitin 2024, u analizuan 10 bashki, mes tyre Durrësi dhe Kavaja.
Raporti u bazua në dy indikatorë kryesorë:
1. Niveli i transparencës së pushtetit vendor
2. Përmbushja e premtimeve elektorale
Niveli i transparencës për Bashkinë Durrës u vlerësua me 93.75%, ndërsa për Bashkinë Kavajë 50%. Ky vlerësim është bërë përmes 16 indikatorëve ligjorë të matjes së transparencës.
Mungesa e informacionit nga institucionet
Përfaqësues të shoqërisë civile ngritën shqetësimin e mungesës së transparencës nga institucionet publike, veçanërisht në dhënien e informacionit në kohë. “Një prej problemeve që vihet re është mungesa e transparencës nga institucionet publike. Informacioni nuk jepet brenda afatit ligjor prej 10 ditësh dhe, në shumë raste, është i paplotë”, theksoi aktivistja Mirjam Reçi.
Përmbushja e premtimeve
Në raport u vlerësuan edhe premtimet e dhëna nga bashkitë:
– Bashkia Durrës: 1 premtim i mbajtur, 3 të pambajtur
– Bashkia Kavajë: 1 premtim i mbajtur, 1 pjesërisht i mbajtur, 2 të pambajtur
Nga dhjetëra premtime të kryetares së Bashkisë Durrës, Emiriana Sako, Faktoje.al verifikoi katër prej tyre:
1. Rindërtimi i pallateve DS5 në lagjen nr. 5 në të njëjtin vend (i pambajtur)
2. Ndërtimi i një godine parkimi publik në qendër të qytetit (i pambajtur)
3. Rikonstruksioni i Qendrës Kulturore për Fëmijë (i mbajtur)
4. Vazhdimi i rikonstruksionit të Pallatit të Sportit (i pambajtur)
Raporti thekson nevojën për rritjen e transparencës dhe përmbushjen e premtimeve nga pushteti vendor, si dhe angazhimin e institucioneve për të garantuar qasjen e qytetarëve në informacion publik.
©️zërionline
