Dëgjesat publike të organizuara nga Bashkia e Durrësit me qytetarët, në dukje një mekanizëm demokratik për përfaqësimin e interesave të komunitetit, vijojnë të shfaqin mangësi të rënda në reflektimin e shqetësimeve të banorëve.
Sipas raportit të Bashkisë Durrës mbi dëgjesat publike për Programin Buxhetor Afatmesëm 2023–2025, në vitin 2022 u organizuan 33 dëgjesa me pjesëmarrjen e 552 banorëve, përfaqësuesve të komunitetit, biznesit dhe shoqërisë civile. Një prej tyre u zhvillua në Sukth, ku 88 banorë ngritën shqetësime të ndryshme, nga problematikat me kanalizimet dhe pastrimin e mbetjeve, deri te ndërprerjet energjetike dhe mungesa e kushteve bazë në shkolla.
Monitorimi i premtimeve
Gjatë vitit 2024, një grup pune i përberë nga banorë të Sukthit dhe mbështetur nga Qendra për Zhvillimin e Shoqërisë Civile Durrës (CSDC) monitoroi situatën në terren për të verifikuar nëse kërkesat e vitit 2022 kishin gjetur zgjidhje. Rezultatet e tyre, të ilustruara me foto, intervista dhe takime me banorët, u publikuan në faqen “Sukthi Monitoron” dhe iu paraqitën Bashkisë Durrës e Këshillit Bashkiak gjatë periudhës nëntor-dhjetor të vitit të kaluar.
Monitorimi zbuloi se pavarësisht angazhimeve publike, pjesa më e madhe e kërkesave të banorëve nuk ishin reflektuar as në buxhetin e vitit 2025. Vetëm një prej tyre, ndërtimi i shkollës 9-vjeçare në Vadardhë, është bërë pjesë e planit të investimeve.
Indiferenca ndaj kërkesave qytetare
Në një përgjigje zyrtare, Bashkia e Durrësit deklaroi se “kërkesat e listuara nuk janë parashikuar në buxhetin e vitit 2025, por do të mbahen në konsideratë për vitin pasardhës”.
Banorët, të cilët tashmë janë mësuar me premtime të ngjashme, shprehin skepticizëm. E papritur ishte mospërfshirja në buxhet edhe për CSDC-në që i ka mbështetur këta banorë duke i inkurajuar të jenë qytetarë aktivë dhe të bashkëpunojnë me Bashkinë për të adresuar problemet e tyre.
“Kemi kërkuar kanalizime në pallatet e Qendër-Sukthit për të shmangur përmbytjet dhe pastrimin e mbetjeve urbane prej vitesh, por ende jemi në pritje. Po ashtu në Hamallaj”, shprehet një nga pjesëmarrësit e monitorimit. “Për ngrohjen në shkollat tona as që diskutohet më, fëmijët vazhdojnë të vijnë me batanije në klasë.”
Këto dhe shumë probleme të tjera që lidhen me infrastrukturën e sinjalistikën rrugore, mirëmbajtjen e varrezave, sigurinë e fëmijëve teksa luajnë në rrugë etj. janë kërkesa jetike për komunitetet e zonave të ndryshme të njësisë administrative Sukth, por ata duhet të presin.
Pavarësisht përpjekjeve të banorëve për të kërkuar llogari përmes dëgjesave publike dhe angazhimeve në monitorim, rezultatet mbeten minimale.
A do të vijojnë këto dëgjesa të jenë thjesht një fasadë e bashkisë, apo më në fund do të kthehen në veprime konkrete? Për momentin, banorët e Sukthit mbeten në pritje.
©️zërionline
