Një incident i rëndë është regjistruar këtë të shtunë në linjën urbane Durrës–Plepa, ku një autobus u përfshi nga flakët gjatë kohës që ishte në lëvizje. Ngjarja ndodhi në sektorin e Hekurudhave, para rrethrrotullimit, te Pelikani, në momentin kur autobusi ishte në lëvizje.
Sipas dëshmitarëve, fillimisht është vënë re tymi që dilte nga pjesa e pasme e mjetit, gjë që ka shkaktuar panik mes udhëtarëve. Fatmirësisht, shoferi ka arritur të ndalojë mjetin dhe udhëtarët kanë mundur të dalin, pa pasoja.
Në vendngjarje kanë mbërritur zjarrfikësit, të cilët kanë arritur të shuajnë flakët, por autobusi është djegur pothuajse plotësisht. Deri tani, dëmet janë vetëm materiale, ndërsa pritet një ekspertizë për të përcaktuar shkakun e zjarrit, që dyshohet një defekt teknik.
Ngjarja ngre sërish shqetësime për gjendjen teknike të mjeteve të transportit urban dhe mungesën e kontrollit periodik të tyre, duke vënë në rrezik jetën e qytetarëve që i përdorin çdo ditë.
©️zërionline
