Ka nisur shpërndarja e materialeve zgjedhore në qarkun e Durrësit, në përgatitje të ditës së votimeve të së dielës, por procesi po shoqërohet me vonesa për shkak të mangësive nga partitë opozitare.
E para që ka nisur shpërndarjen është KZAZ nr. 26, që mbulon territorin e bashkisë së Shijakut. Kjo KZAZ ka filluar shpërndarjen e materialeve me njësitë administrative Maminas dhe Gjepalaj. Në pritje është ende nisja e procesit në qytetin e Durrësit, ndërsa në bashkinë e Krujës shpërndarja pritet të nisë rreth orës 17:00.
Qarku i Durrësit përfshin gjithsej 7 KZAZ, ndërsa të dielën janë thirrur të votojnë 351,983 qytetarë. Ata do të kenë mundësinë të zgjedhin mes 11 subjekteve politike në garë dhe të japin votën e tyre të drejtpërdrejtë për një nga 154 kandidatët në listat e hapura. Në total, në garë janë 209 kandidatë, përfshirë edhe 5 kandidatë të listave të mbyllura.
Bashkia e Durrësit, si më e madhja në qark, numëron 254,507 votues dhe këtë vit përfaqësohet nga 5 KZAZ, një më shumë se në zgjedhjet e kaluara, për shkak të rritjes së numrit të zgjedhësve dhe ndarjes së re administrative.
Sipas përcaktimeve ligjore, shpërndarja e materialeve zgjedhore duhet të nisë të paktën 15 orë përpara hapjes së qendrave të votimit, e planifikuar për orën 07:00 të së dielës. Megjithatë, ky proces po vonohet, për shkak se deri pasditën e së shtunës, Partia Demokratike dhe Partia e Lirisë, të cilat janë në koalicion, nuk kishin dorëzuar ende listat përfundimtare të komisionerëve të qendrave të votimit.
Pritet që procesi në Durrës e Krujë të nisë pas orës 16:00.
©️zërionline
