Ambasadori i Bashkimit Europian në Shqipëri, Silvio Gonzato, ka vëzhguar paraditen e sotme procesin zgjedhor në qytetin e Durrësit. Në një prononcim për mediat, Gonzato theksoi se zgjedhja për të ndjekur nga afër këtë qytet nuk ishte e rastësishme, por një vendim i qëllimshëm për të mos u përqendruar vetëm në Tiranë.
“Erdhëm edhe në Durrës sepse nuk donim të vëzhgonim procesin e zgjedhjeve vetëm në kryeqytet. Kjo është hera e parë që Shqipëria organizon zgjedhje pas çeljes së negociatave me Bashkimin Evropian”, deklaroi ai.
Duke vlerësuar punën e misionit të OSBE-ODIHR, i cili ka shpërndarë dhjetëra ekipe vëzhgimi në të gjithë vendin, ambasadori Gonzato theksoi se prania e tij në Durrës kishte për qëllim njohjen nga afër me ecurinë e procesit zgjedhor në këtë zonë.
Ai nënvizoi se procesi do të analizohet në mënyrë gjithëpërfshirëse, jo vetëm në ditën e votimit, por edhe në periudhën para dhe pas saj. “Nuk mund të jap një vlerësim të menjëhershëm, pasi do të analizojmë me kujdes çdo aspekt të këtij procesi,” përfundoi Gonzato.
Durrësi është një nga qytetet me rëndësi të veçantë në hartën elektorale dhe ndjekja e zhvillimeve aty nga përfaqësuesit e BE-së tregon për rëndësinë që i kushtohet një procesi të rregullt dhe transparent.
©️zërionline
