Partia e Lirisë ka denoncuar publikisht administratën e burgjeve, duke e akuzuar se ka penguar qëllimisht mediat të komunikonin dhe të filmonin drejtuesin e kësaj force politike, Ilir Meta, gjatë procesit të votimit në IEVP “Jordan Misja”.
Zëdhënësi Tedi Blushi deklaroi se ndonëse ishte rënë dakord paraprakisht me administratën që Meta të votonte në orën 10:00 dhe mediat të ishin të pranishme, në momentin e fundit ato nuk janë lejuar të hyjnë në qendrën e votimit.
Sipas Partisë së Lirisë, ky është një shkelje flagrante e të drejtave të njeriut dhe Kushtetutës, ndërkohë që persona të dënuar janë lejuar të flasin dhe të filmohen, por jo kreu i kësaj partie, që sipas saj mbahet në izolim pa prova dhe është ende i padënuar.
Blushi tha se pamja e Ilir Metës me ngjyrat kuq e zi ka trembur qeverinë, ndërsa bëri thirrje për pjesëmarrje masive në votime, duke e cilësuar këtë një moment vendimtar për të gjithë shqiptarët.
©️zërionline
