Procesi i numërimit të votave në KZAZ nr. 22 në Durrës është shoqëruar me tensione, pasi në kutinë 1379/1 të zonës së Arapajt janë gjetur dy fletë votimi më shumë se numri i votuesve të regjistruar në pajisjen elektronike të identifikimit (PEI).
Nga 349 votues të regjistruar në pajisjen e identifikimit elektronik PEI, në kuti janë gjetur 351 fletë votimi. Kjo mospërputhje ka ngritur dyshime mes përfaqësuesve të opozitës dhe ka çuar në debat mes palëve.
Kandidatja e koalicionit PD-ASHM, Jola Hysaj, ka kërkuar pezullimin e menjëhershëm të procesit të numërimit për këtë kuti, deri në dorëzimin e një kërkese zyrtare pranë Komisionit Qendror të Zgjedhjeve (KQZ).
Nga ana tjetër, përfaqësuesi i Partisë Socialiste në këtë KZAZ, Indrit Cerloi, ka kërkuar vijimin e procesit, duke e konsideruar situatën si një gabim njerëzor. Sipas tij, dy votues mund të mos jenë regjistruar nga pajisja elektronike.
Numërimi për ZAZ nr 22 po zhvillohet në ambientet e pallatit të sportit “Ramazan Njala” në Durrës, ku janë të pranishëm komisionerë, vëzhgues dhe përfaqësues të forcave politike.
©️zërionline
