Një njoftim i Shoqërisë Rajonale Ujësjellës-Kanalizime Durrës (SHRUKD) pasditen e së shtunës nxjerr sërish në pah një nga problemet më të ndjeshme të jetës së përditshme, mungesën e një sistemi të qëndrueshëm për furnizimin me ujë të pijshëm. Sipas njoftimit të fundit, defektet në rrjetin e OSHEE-së në zonën e Fushë Kuqes kanë detyruar stakimin e stacioneve të pompimit në Fushë Kuqe dhe Fushë Milot, duke rrezikuar furnizimin me ujë në një sërë zonash përreth.
Në thelb, ky është një realitet i përsëritur që ngre pyetje serioze për koordinimin ndërinstitucional dhe për mungesën e investimeve në infrastrukturë që duhet të garantojë shërbime bazë siç është uji i pijshëm, i cili nuk mund të jetë i varur nga ndërprerjet e zakonshme të energjisë elektrike. Pse stacionet e pompave nuk janë të pajisura me gjeneratorë rezervë? Pse nuk ka një plan emergjence të qartë për raste të tilla, që të mos e pësojnë gjithmonë qytetarët?
Apo ka nisur kriza e ujit me rritjen e temperaturave?
Ndërkohë që SHRUKD apelon për mirëkuptim dhe siguron se është në kontakt të vazhdueshëm me OSHEE-në, mbetet e paqartë se sa shpesh duhet të ndodhë një ndërprerje që autoritetet ta konsiderojnë të nevojshme një zgjidhje afatgjatë. Uji nuk është luks, është një nevojë themelore dhe shërbimi ndaj qytetarëve nuk duhet të jetë kaq i cenueshëm.
Në mungesë të një infrastrukture të besueshme dhe të një komunikimi të qartë e në kohë me publikun, qytetarët do të vazhdojnë të përballen me pasojat e një sistemi që reagon, por nuk parandalon. Dhe kjo, në vitin 2025, është thjesht e pajustifikueshme.
©️zërionline
