Një ngjarje tragjike është shënuar pasditen e sotme në liqenin e Shkodrës, ku një 51-vjeçar ka humbur jetën, ndërsa përpiqej të shpëtonte dy turistë që kishin rënë në ujë.
Sipas burimeve zyrtare, rreth orës 16:32, Salla Operative ka marrë njoftim për incidentin pranë një prej pikave turistike të liqenit. Viktima është identifikuar si Arben Alamani, 51 vjeç, drejtues i një varke për qëllime turistike në varësi të Bashkisë Shkodër.
Alamani dyshohet se është hedhur në ujë për të shpëtuar dy turistë, të cilët për arsye ende të paqarta kishin rënë në liqen. Pavarësisht se ka arritur t’u shpëtojë jetën, vetë ai nuk ka mundur të dalë, duke u mbytur tragjikisht.
Turistët ndodhen jashtë rrezikut për jetën dhe janë në gjendje të mirë shëndetësore, ndërsa në vendngjarje kanë mbërritur menjëherë shërbimet e Policisë dhe grupi i kërkim-shpëtimit, që po vijojnë operacionin për gjetjen e trupit të 51-vjeçarit.
Grupi hetimor ka nisur punën për zbardhjen e plotë të rrethanave të kësaj ngjarjeje që ka tronditur opinionin publik dhe komunitetin lokal.
Arben Alamani cilësohet si një njeri me përvojë dhe përkushtim në shërbim të turizmit lokal. Sot, ai është ndarë nga jeta si një hero i heshtur, duke vendosur jetën e të tjerëve përpara të vetës.
©️zërionline
