Thethi ngrihet në këmbë dhe mbledh Kuvendin e Burrave që shprehet kundër ndërhyrjeve në tokën e tyre.
Në një atmosferë solidariteti dhe shqetësimi, oborri i Kishës së Thethit është kthyer sot në arenën e një prej formave më të lashta dhe simbolike të vetëqeverisjes tradicionale në Malësitë e Veriut, Kuvendin e Burrave të Shalës.
Pleqtë e fshatit, të mbledhur përkrah meshtarit të zonës, Dom Kastriot Demaj, kanë diskutuar situatën alarmante që po kalon Thethi, për shkak të aksioneve të fundit për prishjen e ndërtimeve dhe ndërhyrjeve të dyshimta në pronat e banorëve vendas.
Në përfundim të mbledhjes, u mor një vendim i prerë: “Pa pëlqimin e komunitetit, asnjë investitor, vendas apo i huaj, nuk do të gëzojë asnjë centimetër tokë në Theth”. Burrat e Thethit njëzëri kundërshtuan çdo tentativë që, sipas tyre, cenon jetën, pronën dhe të drejtën zakonore të banorëve autoktonë.
Kuvendi u bëri thirrje autoriteteve shtetërore që të ndalojnë menjëherë aksionet e dhunshme dhe të nisin një proces dialogu me komunitetin, për të gjetur një zgjidhje të qëndrueshme që respekton trashëgiminë kulturore, historike dhe ligjore të kësaj zone të veçantë.
Në Kishën e Thethit në meshën e së dielës, Dom Kastriot Demaj dha një mesazh paqeje, uniteti dhe reflektimi, jo vetëm për komunitetin, por edhe për autoritetet shtetërore.
Kujtojmë se Kuvendi i Burrave në Malësitë e Veriut është një institucion shekullor i bazuar në normat e Kanunit të Lekë Dukagjinit. Ai ka funksionuar përmes fjalës së dhënë dhe nderit të burrave të malësisë, duke vendosur drejtësi, marrëveshje dhe paqe në komunitet, një simbol i fuqishëm i vetëmenaxhimit dhe respektit ndaj rendit tradicional.
©️zërionline
