Ngjarja e rëndë e një dite më parë në Ksamil, ku një konflikt mes disa personave degjeneroi në dhunë fizike dhe dëme materiale ka çuar në pranga disa persona. Policia e Sarandës ka arrestuar tre shtetas dhe ka proceduar penalisht një të mitur dhe një grua, pas dokumentimit të plotë të rrethanave të ngjarjes.
Sipas njoftimit zyrtar të policisë, ngjarja ndodhi pranë një plazhi publik, ku 46-vjeçari A. P., banues në Tiranë, është dhunuar me sende të forta nga disa persona, për motive të dobëta. Si pasojë e goditjeve, ai ka marrë dëmtime trupore.
Në pranga ranë shtetasit: A. T., 43 vjeç, banues në Berat, S. S., 18 vjeç, banues në Dibër, A. Z., 35 vjeç, banues në Durrës.
Ndërkaq një 17-vjeçar nga Kamza, për shkak të moshës, u procedua në gjendje të lirë. Të katërt akuzohen për veprën penale “Plagosje e lehtë me dashje”, kryer në bashkëpunim.
Konflikti nuk u mbyll me kaq. Sipas hetimeve, bashkëshortja e të dëmtuarit, shtetasja O. P., 40 vjeçe, pas incidentit ka shkaktuar dëme materiale në ambientet e “beach bar”-it në pronësi të A. T., njërit prej të arrestuarve. Ajo akuzohet për veprën penale “Shkatërrimi i pronës” dhe është proceduar penalisht në gjendje të lirë.
Materialet procedurale janë referuar Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për vijimin e mëtejshëm të hetimeve dhe ndjekjen penale të autorëve.
Ngjarja thekson edhe njëherë tensionet e vazhdueshme që lindin gjatë sezonit turistik në zonat bregdetare, shpesh për arsye banale, duke vënë në rrezik sigurinë e pushuesve.
©️zërionline
