Flakët që kanë përfshirë disa fshatra të Delvinës po shkaktojnë jo vetëm dëme materiale, por edhe rrezik serioz për jetën e banorëve dhe të forcave që ndodhen në terren për të përballuar situatën.
Shefi i Komisariatit të Delvinës, Agim Troci, ka pësuar djegie në krahë dhe këmbë, si dhe është asfiksuar nga tymi, ndërsa përpiqej të shpëtonte disa banorë nga zjarri. Ai është transportuar me urgjencë drejt Spitalit të Traumës në Tiranë, ku deklarohet se ndodhet jashtë rrezikut për jetën.
Në përpjekje për të ndihmuar në shuarjen e flakëve janë asfiksuar edhe shefi i krimeve të komisariatit, Joni Lame, si dhe një banor i fshatit Kopaçez, Apostol Zhupa. Të dy janë dërguar në spital për ndihmë mjekësore.
Situata është më kritike në fshatrat Palavli, Vergo dhe Kopaçez, ku Ministria e Mbrojtjes ka urdhëruar evakuimin e banorëve për shkak të përhapjes së shpejtë të zjarrit. Deri tani raportohet për shtëpi të shkrumbuara, stane të djegura dhe dhjetëra krerë bagëti të humbura. Flakët kanë përfshirë edhe kishën 200-vjeçare të Shën Dhimitrit, e cila është shkatërruar plotësisht.
Autoritetet lokale dhe forcat zjarrfikëse janë në terren, ndërsa vijon përpjekja nga toka dhe ajri për të vënë situatën nën kontroll.
©️zërionline
