Një zjarr i përmasave të mëdha ka përfshirë pasditen e sotme zonën kodrinore të njësisë administrative Cepo, duke rrezikuar drejtpërdrejt fshatrat Humelicë dhe Picar. Flakët, të nxitura nga era e fortë dhe terreni i thatë, janë përhapur me shpejtësi në një sipërfaqe të gjerë, duke përfshirë barishte dhe shkurre.
Situata shfaqet veçanërisht problematike në faqet e kodrave dhe në hapësirën mes dy fshatrave, ku zjarri po përparon drejt zonave të banuara. Forcat zjarrfikëse ndodhen në terren dhe po punojnë intensivisht për izolimin e vatrave, me synim ndalimin e përhapjes së tyre drejt banesave.
Operacioni për shuarjen e zjarrit vijon ende.
Njësia administrative Cepo bën pjesë në bashkinë Gjirokastër dhe përfshin disa fshatra, mes të cilëve Humelicë, Picar, Zhulat, Fushëbardhë, Mashkullorë dhe Labovë e Kryqit. Zona është kryesisht malore e kodrinore, me terren të thyer dhe me sipërfaqe të mëdha me barishte e shkurre, që e bën të prekshme ndaj zjarreve në periudhat e thata.
©️zërionline
