Një reagim i shpejtë, një vendim i guximshëm dhe një zemër e madhe në shërbim të jetës. Kështu qe ndërhyrja e Inspektor Klajdi Mustaj, punonjës i Policisë Rrugore, i cili u bë shpëtimtar për tre qytetarë të dëmtuar në një aksident në aksin rrugor Levan-Fier.
Ai u pa teksa u vinte në ndihmë dhe vraponte me të dëmtuarit në krah për t’u ardhur në ndihmë, pa u menduar dy herë.
Drejtori i Përgjithshëm i Policisë së Shtetit, Drejtues Madhor Ilir Proda, e vlerësoi publikisht këtë akt humanizmi dhe përgjegjësie, duke i akorduar Mustajt Certifikatën për Shërbime të Dalluara.
“Veprimi i Inspektor Klajdi Mustaj tregon më së miri misionin e Policisë së Shtetit: të jemi aty ku qytetarët kanë më shumë nevojë për ne. Guximi, profesionalizmi dhe reagimi i shpejtë i punonjësit tonë është shembull frymëzues për të gjithë trupën policore”,- u shpreh Proda, duke i shprehur mirënjohje për sakrificën dhe përkushtimin e treguar.
Pjesë e Policisë së Shtetit prej shkurtit 2024, kur përfundoi Kolegjin Profesional për Patrullë të Përgjithshme, Klajdi Mustaj ka formim akademik në Shkencat Juridike dhe aktualisht ndjek studimet Master. Në pak muaj shërbim, ai ka dëshmuar se uniforma nuk është vetëm detyrë, por edhe mision për të mbrojtur dhe shpëtuar jetë.
Në këtë rast, tre qytetarë e kanë jetën falë ndërhyrjes së tij, ndërsa Policia e Shtetit ka një shembull të gjallë se çfarë do të thotë të jesh në shërbim të jetës.
©️zërionline
