Një operacion policor në orët e para të kësaj të shtune ka përfshirë mjediset e televizionit News 24 dhe të grupit mediatik Panorama Group, duke shkaktuar dhe reagime të forta nga organizatat e gazetarëve.
Policia nuk lejon gazetarët të hyjnë në godinë dhe të ushtrojnë detyrën e tyre misionare, si çdo ditë. Sinjali televiziv i News 24 është bllokuar.
Sipas informacioneve të konfirmuara dhe nga kolegët gazetarë, si dhe Unioni i Gazetarëve Shqiptarë (UGSH), forca të shumta policore, të shoqëruara nga mjete dhe përfaqësues të institucioneve shtetërore, kanë hyrë në ambientet e kompanive mediatike Media Focus Group dhe Panorama Group. Autoritetet pretendojnë se këto godina janë pronë shtetërore dhe duhet të lirohen, ndërsa drejtuesit e kompanisë theksojnë se i kanë marrë me qira prej dekadash. Çështja ka qenë më herët objekt përplasjesh dhe proceseve gjyqësore mes palëve.
UGSH ka shprehur shqetësim për zhvillimet e sotme, duke paralajmëruar se ndërhyrja e autoriteteve mund të pengojë dhe madje të ndërpresë punën e gazetarëve, duke cenuar transmetimin e një kanali informativ të rëndësishëm në hapësirën mediatike kombëtare.
“Ne po ndjekim me vëmendje komunikimin dhe sqarimet e palëve në këtë përplasje, e cila ka një histori pararendëse. Jemi në alert për lirinë e medias dhe për ushtrimin e funksionit nga gazetarët e këtij seti mediatik”, thuhet në deklaratën zyrtare të Unionit të Gazetarëve Shqiptarë.
Deri në momentin e publikimit të këtij lajmi, Policia e Shtetit nuk ka dalë ende me një njoftim zyrtar për ndërhyrjen dhe arsyet e saj, ndërsa në ambientet e kompanive vijon prania e forcave të rendit.
©️zërionline
