Në Ditën Ndërkombëtare të Fotografisë, të burgosurat dhe paraburgosurat e IEVP Pojskë në Pogradec patën mundësinë të shprehnin botën e tyre të brendshme përmes artit fotografik.
Çdo foto e realizuar prej tyre nuk ishte thjesht një imazh, por një dritare drejt lirisë, një pasqyrë e ndjenjave dhe mendimeve që nuk mund t’i kufizojnë muret. Përmes objektivit, ato gjetën mënyrën për të folur ndryshe, duke treguar se krijimtaria mbetet gjithmonë e lirë, pavarësisht rrethanave.
Arti i fotografisë u kthye në një mjet reflektimi, shprese dhe fuqizimi personal. Një kujtesë se edhe në hapësira të kufizuara, shpirti krijues gjen gjithmonë rrugën për të dalë në pah.
Fotot e realizuara në këtë ditë u ndanë edhe nga drejtori i përgjithshëm i burgjeve shqiptare, Klevis Qose, i cili theksoi se iniciativa të tilla nuk kanë vetëm vlerë artistike, por edhe një dimension human, duke i dhënë zë dhe hapësirë krijimtarisë së grave në kushte të vështira.
©️zërionline
