Bashkia e Durrësit ka shpallur sot zyrtarisht pozicionet e lira të punës për Drejtorin Ekonomik dhe Drejtorin e Shërbimeve Sociale. Të dyja këto poste kanë mbetur vakant që prej muajit korrik, pas dorëheqjes së Ermal Lufos dhe Meme Xhaferrajt, të cilët së bashku me drejtues të tjerë të bashkisë dhe administratorët e 11 njësive administrative dhe rajoneve iu përgjigjën të detyruar kërkesës së kryeministrit Edi Rama për të lënë funksionet e tyre.
Edhe pse kanë kaluar mbi dy muaj nga dorëheqjet dhe drejtorët kanë qenë në dispozicion, procesi për zëvendësimin e tyre ka hyrë vetëm tani në një fazë të re, atë të shpalljes së vendeve të lira përmes procedurave ligjore të shërbimit civil. Fillimisht, pozicionet do të ofrohen për nëpunësit civilë të së njëjtës kategori për lëvizje paralele, apo ngritje në detyrë, ndërsa në rast se mbeten sërish vakante, ato do të hapen edhe për kandidatët jashtë shërbimit civil.
Ndërkohë, vetëm javën e kaluar, kryebashkiakja Emiriana Sako pranoi zyrtarisht dorëheqjet e 5 administratorëve të zonave rurale, njësive administrative Ishëm, Katund i Ri, Manëz, Sukth, Rrashbull, duke emëruar 4 pasues të rinj. Ende jo atë të Sukthit.
Për drejtoritë e bashkisë, megjithatë, po ndiqet një procedurë më e gjatë dhe konkurruese, çka ka shtyrë afatin e risfreskimit të stafit drejtues në një prej bashkive më të mëdha të vendit.
Ky proces pritet të testojë jo vetëm interesin e nëpunësve civilë për të marrë pozicionet e drejtimit duke sjellë thjesht rotacion drejtuesish brenda për brenda bashkisë, por edhe të sjellë figura të reja në administratën vendore të Durrësit.
©️zërionline
