Policia e Durrësit ka goditur një tjetër rast të shpërndarjes së lëndëve narkotike, duke vënë në pranga një 19-vjeçar që vepronte në lagje të ndryshme të qytetit.
Sipas njoftimit zyrtar, specialistët për Hetimin e Narkotikëve, në bashkëpunim me shërbimet e Komisariatit të Policisë Durrës, kanë finalizuar me sukses një operacion të bazuar në informacione operative, që çoi në arrestimin e shtetasit E. H., 19 vjeç, banues në lagjen nr. 13 të Durrësit.
Nga hetimet paraprake, dyshohet se i riu shpërndante lëndë narkotike të llojit cannabis sativa në zona të ndryshme të qytetit bregdetar. Gjatë kontrollit të ushtruar ndaj tij, policia gjeti dhe sekuestroi një sasi lënde narkotike, e cila ishte përgatitur për t’u shitur në doza të vogla.
Lënda narkotike është sekuestruar në cilësinë e provës materiale, ndërsa materialet hetimore i janë kaluar Prokurorisë pranë Gjykatës së Shkallës së Parë Durrës për vijimin e procedurave ligjore.
Ky arrestim është pjesë e operacioneve të njëpasnjëshme që po zhvillon Policia e Durrësit për të goditur rrjetet e shpërndarjes së drogës në qytet dhe për të parandaluar përfshirjen e të rinjve në veprimtari të paligjshme.
©️zërionline
