Policia e Durrësit ka finalizuar operacionin e koduar “Next”, një tjetër goditje ndaj trafikut të lëndëve narkotike në port. Në pranga ka rënë një shtetas italian, 25 vjeç, me inicialet S. M., marinar në linjën detare Durrës–Ankona.
Sipas strukturave të Seksionit për Hetimin e Narkotikëve në DVP Durrës, në bashkëpunim me Policinë Kufitare të Portit, informacionet operative çuan në mbajtjen nën vëzhgim të të riut italian. Ai u ndalua në terminalin e pasagjerëve, në momentin e daljes nga territori shqiptar.
Gjatë kontrollit fizik, shërbimet e Policisë i gjetën një pako me lëndë narkotike kanabis, të përgatitur në formë boçeje dhe të destinuar, sipas dyshimeve, për t’u transportuar në Itali.
Materialet hetimore i janë kaluar Prokurorisë së Durrësit, ndërsa 25-vjeçari do të hetohet për veprën penale “Trafikim i lëndëve narkotike”. Autoritetet theksojnë se operacionet kundër tentativave të tilla do të vijojnë pa ndërprerje.
