Momente horror u përjetuan mbrëmjen e kaluar në plazhin Bondi të Sydney-t, Australi, ku gjatë një eventi publik të lidhur me festën e Hanukkah-ut, një sulm i armatosur tronditi qytetin. Të paktën 10 persona humbën jetën dhe rreth 60 të tjerë mbetën të plagosur, mes tyre edhe efektivë policie, pas të shtënave me armë zjarri që shkaktuan panik masiv mes qytetarëve dhe vizitorëve të shumtë që ndodheshin në zonë.
Ngjarja ndodhi pranë një prej plazheve më të frekuentuara të Australisë, ku ishin mbledhur për të shënuar Hanukkah-un. Sirenat, të shtënat dhe vrapimet e njerëzve për t’u shpëtuar plumbave krijuan një skenë kaosi, ndërsa forca të shumta policie dhe shërbime emergjence mbërritën menjëherë në vendngjarje.
Në mes të kaosit, një moment i jashtëzakonshëm guximi u fiksua edhe në video dhe po qarkullon gjerësisht në rrjete sociale. Një burrë, i veshur me një bluzë të bardhë, vërejti një nga sulmuesit teksa qëllonte drejt turmës. Pa hezitim, ai iu afrua atentatorit nga mbrapa dhe, pas një përplasjeje të shkurtër fizike, arriti t’i kapë armën dhe t’ia heqë nga duart, duke e çarmatosur dhe duke shmangur kështu pasoja edhe më tragjike.
Pas sulmit, një pamje simbolike dhe prekëse nga vendngjarja ka bërë xhiron e mediave: një shall lutjeje hebraike, i përgjakur, që i përkiste një personi të pranishëm në event, dëshmi e dhunës së përjetuar gjatë festës fetare.
Autoritetet australiane kanë konfirmuar se bëhet fjalë për një sulm masiv me armë zjarri gjatë një eventi publik dhe se hetimet janë në vijim për të zbardhur rrethanat, motivet e autorëve dhe nëse ka persona të tjerë të përfshirë. Ndërkohë, qyteti i Sydney-t dhe komuniteti hebraik janë zhytur në zi, ndërsa autoritetet kanë rritur masat e sigurisë në zona publike dhe evente të ngjashme.
Po çfarë po festohej?
Festa Hanukkah (ose Chanukah) është një festë hebraike, e njohur si Festa e Dritave.
Ajo zgjat 8 ditë dhe përkujton një ngjarje historike që lidhet me ripërkushtimin e Tempullit të Dytë në Jerusalem, rreth shekullit II p.e.s., pas fitores së hebrenjve mbi sundimin greko-sirian.
Sipas traditës hebraike, kur tempulli u pastrua dhe u rihap, kishte vaj të mjaftueshëm për të ndezur kandilin vetëm për një ditë, por mrekullisht ai qëndroi i ndezur për tetë ditë. Pikërisht kjo mrekulli simbolizon Hanukkah-un.
Në thelb, Hanukkah është një festë paqësore, që simbolizon besimin, qëndresën dhe dritën mbi errësirën, që e bën edhe më tronditës faktin që një ngjarje e tillë e dhunshme ndodhi gjatë një eventi festiv.
©️zërionline
