Një ngjarje e rëndë është regjistruar në orët e para të mëngjesit të së dielës në Institucionin e Ekzekutimit të Vendimeve Penale (IEVP) Shkodër, ku një i paraburgosur 62 vjeç ka humbur jetën pas një përkeqësimi të papritur të gjendjes shëndetësore.
Bëhet fjalë për shtetasin me inicialet Ç. J., i lindur më 10 nëntor 1964, i cili ishte i akomoduar në të njëjtën dhomë me të birin, të burgosurin me inicialet D. J.
Sipas informacionit zyrtar, sapo u konstatua gjendja e rënduar shëndetësore, personeli mjekësor i burgut ndërhyri menjëherë duke i dhënë ndihmën e parë. Më pas u vendos transportimi i tij me urgjencë drejt Spitalit të Koplikut.
Edhe pse gjatë transportit dhe në urgjencën e spitalit u kryen të gjitha procedurat e reanimimit kardiorespirator, mjekët nuk arritën ta mbanin në jetë, duke konstatuar vdekjen e tij.
Pas ngjarjes janë njoftuar organet kompetente, të cilat kanë nisur veprimet procedurale për dokumentimin e plotë të rastit dhe zbardhjen e rrethanave që çuan në humbjen e jetës së të paraburgosurit.
Në reagimin e saj, Drejtoria e Përgjithshme e Burgjeve shprehu ngushëllimet për familjen e të ndjerit dhe theksoi se do të bashkëpunojë plotësisht me organet e drejtësisë deri në sqarimin e plotë të kësaj ngjarjeje.
Lajmi në përditësim…
©ZëriOnline
