Një praktikë e paligjshme dhe me pasoja të rënda për jetën e njerëzve dhe mjedisin ka shkaktuar një tjetër tragjedi në bregdetin shqiptar. Një 65-vjeçar humbi jetën paraditen e së enjtes në Himarë, pasi dyshohet se u plagos nga shpërthimi i lëndës plasëse që po përdorte për peshkim.
Sipas të dhënave paraprake, rreth orës 09:00, në afërsi të zonës së Porto Palermos, shtetasi me iniciale P. M., 65 vjeç, dyshohet se ishte duke peshkuar në mënyrë të paligjshme me lëndë plasëse, kur eksplozivi shpërtheu duke i shkaktuar dëmtime të rënda.
I plagosuri u transportua me urgjencë në Qendrën Shëndetësore të Himarës, por nuk arriti t’u mbijetojë plagëve dhe humbi jetën.
Ngjarja rikthen në vëmendje rrezikun e madh që paraqet peshkimi me dinamit, një praktikë e ndaluar me ligj, e cila jo vetëm rrezikon jetën e personave që e përdorin, por shkakton edhe dëme të parikuperueshme në ekosistemin detar. Shpërthimet shkatërrojnë habitatet nënujore, vrasin peshq të çdo madhësie dhe dëmtojnë biodiversitetin, ndërsa në jo pak raste kanë përfunduar edhe me viktima apo të plagosur.
Megjithëse autoritetet deklarojnë se zhvillojnë kontrolle të vazhdueshme për goditjen e këtij fenomeni, raste të tilla dëshmojnë se përdorimi i lëndëve plasëse për peshkim mbetet ende një problem në disa zona bregdetare.
Ndërkohë, grupi hetimor, nën drejtimin e Prokurorisë, po vijon veprimet për të zbardhur plotësisht rrethanat e ngjarjes dhe për të dokumentuar rastin.
©ZëriOnline
