Ekipet e shërbimit zjarrfikës të Durrësit i janë përgjigjur me urgjencë thirrjes për ndihmë pas zjarrit masiv që përfshiu rajonin e Himarës. Përmes një deklarate direkt nga terreni, një prej pjesëtarëve të ekipit, komandanti Gentjan Kotoni, ka rrëfyer sfidat dhe punën e pandërprerë për neutralizimin e vatrës së zjarrit.
Sipas Kotonit, ekipi i përbërë nga 5 persona, 4 zjarrfikës së bashku me komandantin, u nis nga Durrësi rreth orës 23:00. Kjo ndërhyrje erdhi menjëherë pasi ata kishin përfunduar një shërbim intensiv 24-orësh në Durrës.
“Sa mbërritëm këtu, pamë që situata ishte me të vërtetë e keqe. Ishin djegur ullinjtë nga të dyja krahët e rrugës”, tregon ai.
Beteja me flakët dhe bilanci i dëmeve
Me të mbërritur në vendngjarje, ekipi u organizua në grupe për të vënë nën kontrol vatrat përgjatë rrugës kryesore dhe për të garantuar kalimin e sigurt të automjeteve. Falë ndërhyrjes së tyre, situata u normalizua.
Sipas informacioneve të mbledhura në terren nga banorët e zonës, Kotoni do të deklaronte bilancin e dëmeve:
- Rreth 6,500 rrënjë ullinj (përfshirë edhe ullinj shekullorë) u përfshinë nga flakët.
- 2 deri në 3 banesa pësuan dëmtime ose u dogjën.
Pavarësisht orëve të gjata pa gjumë dhe vështirësisë së lartë të operacionit, zjarrfikësit nga Durrësi vazhduan punën në terren gjatë gjithë mëngjesit të sotëm për sigurinë e plotë të zonës.
©ZëriOnline
