Një prej superjahteve më të famshme në botë A+ ka mbërritur në ujërat shqiptare, duke tërhequr vëmendjen për përmasat dhe luksin e tij.
Jahti i është atribuar në raportime Sheikh Mansour bin Zayed Al Nahyan, anëtarit të familjes mbretërore të Abu Dhabit dhe pronarit të Manchester City. A+ është një nga jahtet private më të mëdha në botë dhe vlera e tij është vlerësuar në qindra milionë dollarë.
Por përtej luksit, vizita e tij në Shqipëri pritet të sjellë edhe të ardhura për arkën e shtetit. A+ dhe anija mbështetëse që e shoqëron, M2, do të furnizohen me rreth 700 mijë litra naftë, nga e cila buxheti i shtetit pritet të arkëtojë rreth 280 mijë euro përmes taksës së luksit.
Shuma konsiderohet një tjetër tregues i të ardhurave që mund të gjenerohen nga vizitat e superjahteve në portet shqiptare. Vetëm gjatë vitit 2025, furnizimet me karburant të jahteve luksoze në portet e vendit i sollën buxhetit të shtetit mbi 12 milionë euro nga kjo taksë.
Mbërritja e A+ në Shqipëri është një tjetër sinjal i interesit që po tregojnë pronarët e superjahteve për bregdetin shqiptar, ndërsa qëndrimet e tyre shoqërohen me shpenzime të konsiderueshme dhe të ardhura për ekonominë vendase./ZO
©ZëriOnline
