Një ditë pas tragjedisë që tronditi Tropojën, ku një punonjës i Bashkisë humbi jetën dhe tre të tjerë u plagosën nga kontakti me energjinë elektrike, policia ka ndaluar dy drejtues të Bashkisë.
Në kuadër të hetimeve për ngjarjen e rëndë të ndodhur në rrugën e Dobravës, janë ndaluar për veprën penale “Shkelja e rregullave të mbrojtjes në punë” drejtori i Drejtorisë së Turizmit, Shërbimeve Publike dhe Transportit, Ndriçim Gjocsj, 36 vjeç, dhe drejtuesi teknik i punimeve, Gëzim Hasanpapa, 60 vjeç.
Ngjarja ndodhi më 8 shtator, rreth orës 10:00, pranë fshatit Bujan. Sipas hetimeve paraprake, katër punonjës të Sektorit të Shërbimeve të Bashkisë Tropojë po vendosnin një shtyllë ndriçimi në bazament, kur shtylla ka prekur telat elektrikë.
Rryma u përcoll te punonjësit, duke shkaktuar vdekjen e Muham Sylisufaj, 59 vjeç, dhe dëmtimin e tre kolegëve të tij. Të plagosurit, Albert Dunisha, Ilir Dautaj dhe Afrim Aliaj, u transportuan për ndihmë mjekësore dhe ndodhen jashtë rrezikut për jetën.
Hetimi vijon nën drejtimin e Prokurorisë për të zbardhur të gjitha rrethanat dhe përgjegjësitë që lidhen me tragjedinë.
Materialet procedurale i janë referuar Prokurorisë për veprime të mëtejshme.
©ZëriOnline
