Në ditën e 10-të të grevës së urisë, punonjësit e Bankers Petroleum në Patos-Marinzë kërkojnë ndërhyrje të menjëhershme nga institucionet shtetërore dhe ndërkombëtare, ndërsa gjendja e tyre shëndetësore po përkeqësohet çdo ditë.
Naftëtarët i janë drejtuar me një shkresë zyrtare Komisionerit për Mbrojtjen nga Diskriminimi, Avokatit të Popullit dhe Ambasadorit të BE në Shqipëri, Silvio Gonzato, duke theksuar se situata është kritike dhe kërkon vëmendje e përkrahje urgjente për të shmangur pasoja të rënda për jetën e tyre.
Më herët, ata kanë njoftuar edhe Kryeministrin Edi Rama, Ministrinë e Infrastrukturës dhe Energjisë, si dhe institucione të tjera shtetërore, duke kërkuar zgjidhje të menjëhershme të konfliktit që ka çuar në pezullimin e punës në vendburimin më të madh të naftës në vend.
Sipas punonjësve, zgjatja e grevës rrezikon jo vetëm shëndetin e tyre, por edhe prodhimin dhe ekonominë lokale, ndaj kërkojnë dialog të drejtpërdrejtë dhe ndërhyrje institucionale pa vonesa.
©️zërionline
