Unioni i Gazetarëve Shqiptarë (UGSH) ka dënuar ashpër qëndrimet policore të njoftuara së fundmi nga Drejtori i Përgjithshëm i Policisë së Shtetit, Muhamet Rrumbullaku, që synojnë gazetarët dhe raportimet e tyre mbi rastin tragjik të vdekjes së 42-vjeçarit Egli Proga në Pogradec.
Në një deklaratë të bërë publike sot, UGSH shprehu shqetësimin për atë që e cilësoi si një përpjekje për të intimiduar gazetarët dhe për të kufizuar lirinë e tyre për të raportuar. Sipas Unionit, raportimet e mediave kanë luajtur një rol kyç në detyrimin e autoriteteve për të dhënë shpjegime publike mbi rastin e Progas, i cili ka ngritur pikëpyetje të mëdha në lidhje me veprimet dhe mosveprimet e organeve të rendit.
“Raportimet e gazetarëve kanë zbuluar vonesa dhe mangësi serioze në informimin e publikut,” thuhet në deklaratën e UGSH.
Deklarata e UGSH erdhi si përgjigje ndaj komenteve të bëra nga Rrumbullaku në një konferencë për shtyp më 14 gusht. Ai kritikoi gazetarët për atë që e cilësoi si “baltosje” të policisë dhe paralajmëroi hetime kundër tyre për përhapjen e, sipas tij, “disinformimit të qëllimtë”. Rrumbullaku njoftoi se Drejtoria e Marrëdhënieve me Median dhe departamentet respektive të Policisë së Shtetit po përgatisin kallëzime penale ndaj individëve dhe rrjeteve sociale që përhapin informacione të rreme.
Deklaratës së Rrumbullakut i është bashkuar edhe Kryeministri Edi Rama, i cili bëri thirrje për të luftuar disinformimin dhe keqinformimin në publik. Megjithatë, UGSH e sheh këtë si një përpjekje për të kontrolluar raportimet e pavarura dhe për të intimiduar gazetarët.
“Hetimet e kësaj natyre krijojnë një klimë frike dhe censurë mbi raportimet pluraliste në media,” thuhet në deklaratën e UGSH. “Gazetarët duhet të jenë të lirë të bëjnë punën e tyre pa pasur frikë nga represioni ose ndëshkimi.”
Unioni theksoi se këmbëngulja e mediave për të ndriçuar rastin e Pogradecit ka rritur ndërgjegjësimin publik dhe ka nxjerrë në pah çështje të rëndësishme sociale, duke përfshirë trajtimin e padrejtë të familjes së viktimës, e cila u la në një situatë të pasigurt pas vdekjes së kryefamiljarit.
@zërionline
